تلطيش الحياة - اللي ماكانش تلطيش قوي يعني - علمني ان مافيش حاجة بتطوِّل على حالها.
الوقت الحلو بيمر بسرعة وبيخلص.. والوقت الوحش حتى لو عدى بطيء، برضو بيخلص.
الناس معظمها بيروح ويرجع.. وفيهم بيروح مابيرجعش.. وقليلين قوي اللي بيفضلوا العمر.
الشغل بيتغير دايماً.. ساعات تغييرات صغيرة وساعات تغييرات كبيرة.. ساعات تغييرات للأحسن وساعات للأوحش.. المهم إنه في جميع الأحوال بيتغير..
في حوالي ٣ سنين، اتغيرت كل حاجة - حرفياً - كل حاجة في حياتي!
في كل مرة حاجة تتغير بأحس إني داخلة على مجهول، بفرمل، وافكر، وأشوف السيلڤر لاينينج وأخليه قدامي.. بعد شوية ابتدي آخد من السيلڤر لاينينج ده طاقة ايجابية تعودني وتقويني على التغيير اللي حصل، والدنيا بتمشي.
بلد اتغيرت، اتفزعت، فرملت، فكرت.. معلش هي دلوقتي بتغلي بس بعد كده هاتسيبيها أحسن لإبنك
صحاب اتغيروا، اتوجعت، فرملت، فكرت.. معلش ماهو اللي مش عايز يقبلني على حالي وبعيوبي مش هاتحايل عليه يستنى
علاقات اتغيرت، اتصدمت، فرملت، فكرت.. فُقت وعرفت قد ايه كنت دافنة نفسي على الفاضي، وعرفت قد ايه حلو وممتع ان الواحد يفوق لنفسه وياخد باله منها.
ناس مشيت بلا رجعة، حزنت، غضبت، فرملت وفكرت.. هديت علشان ارتاحوا بس وجعهم لسا ماراحش.
شغل اتغير.. اتغير كتير.. اتعلمت، وفهمت، وكملت لأني من يوم ما ابتديت وانا عارفة اني باشتغل الشغلانة دي علشان باحبها، مش بس علشان اقبض مرتب
تفكيري اتغير؛ ثوابت كتير اتحركت ومبادئ كتير اتعدلت أو اتشالت خالص وجه بدالها.. بس انا باحب تفكيري يفضل يتغير ويتجدد علشان مايجيليش غباء وتيبس في خلايا المخ.
أهم حاجة في كل ده: السيلڤر لاينينج، دايماً لازم ألاقيه وأعمله بنزين طاقة إيجابية.. دايماً.
بس لما التغييرات اللي حاصلة تبقا كتير قوي، في وقت قليل قوي، وتاخد منك مجهود في التعايش، وبعدين تحصل حاجات تحسسك ان مجهودك ده كله راح على الفاضي؛ بتشوف بعينيك معاني كلمات زي " حياة، عُمْر، وقت" وبتحس انك خايف ماتلحقش..
خايف ماتلحقش تعرف كل الوشوش الجميلة اللي المفروض تعرفها، تشوف كل الضحكات اللي عايز ترسمها، تعلم كل الناس اللي محتاجاك تعلمها، خايف إنك ماتحسش بالوقت اللي بيعدي..
خايف تكون راكن حياتك مستني تعيشها بعدين، لما "تروق وتحلى".. اللي هو مش واقعي لإنها - تاني - مش ثابتة على حال، وبعدين ماتلحقش علشان جه وقتك تمشي..
ماكنتش ابداً عايزة أمشي، حتى في أصعب أوقات..
بس مش عارفة ليه اليومين دول شايفة في المشي راحة.
فيها ايه لما أمشي وأرتاح؟
هايحصل إيه يعني؟!
