كتائب الفرقان بتصفي ضباط وعساكر جيش ومسميين ظباط الجيش: "المرتدين"!؟
مخي هاينفجر أسئلة
١- مين كتائب الفرقان؟ فشخت النت تدوير مش عارفة الاقي معلومات عنهم.. اللي عارف يبعتلي!
٢- الضباط مرتدين ازاي؟ ومرتدين عن ايه بالظبط؟
٣- عرفتوا ازاي انهم مرتدين؟
٤- بافتراض انهم مرتدين (عن الإسلام، مش عن حكم مرسي)، انتو مالكو؟ أه معلش دانتو حاميين حمى الإسلام ولازم تحاربوهم زي ما الرسول حاربهم، الف الف سلامة ربنا يشفيكم! طب هي الحرب مش بتكون فيها تكافؤ في الاستعداد والسلاح والعدد؟ ولا تصطادوهم في عربيات الجيش بمنتهى الجبن وتقولوا حاربنا؟
٥- جيش ايه وزفت ايه اللي بيموتوا وهما فيه زي الفراخ كده من غير مقاومة؟ مفيش تدريب واحد يوحّد ربنا لضباط الجيش على الهجمات الفجائية؟ وبعدين هو احنا خلاص لازم نسمع كل اسبوع عن كمين الريسة وان مجندين اتقتلوا فيه؟
٦- لما الجيش غلبان كده، مستتخن نفسه ليه على سيناء وبيضربها كلها عاطل في باطل؟ هما كتائب الفرقان ساكنين هناك ايجار جديد؟!
٧- ازاي اللي يعرف اللي حاصل ده يمشي ورا السيسي أو يطالب برجوع مرسي؟! بقالنا سنتين ونص بنموت.. بنموت!! ومش بنبطل نموت سواء في حكم عسكري أو اسلامي أو "مدني"! هانبطل نموت امتا؟!
مش فاهمة.. بجد مش فاهمة وعايزة أفهم
No comments:
Post a Comment