مديرة المصرف المتحد فرع سفيرتستقبل الشكاوي بالزعيق

فاطمة الصياد مديرة المصرف المتحد فرع سفيرتستقبل الشكاوي بالزعيق

يوم الأربعاء الماضي إستقبل المصرف المتحد تحويل لي من زوجي و لم يتم إبلاغي بالتليفون كما هي العادة دائماً عندما يرسل لي زوجي أي نقود. إنتظرت مكالمة هاتفية تبلغني بموعد توصيل الحوالة (حتى المنزل – كما وعدوا زوجي حين كان يقوم بالتحويل و أخدو 3 دولار رسوم) و لم تأت حتى قررت أن أذهب بنفسي للمصرف وأسأل عن الحوالة، متوقعة أن يتم الأمر في حوالي 15 دقيقة بالكتير و أمشي. لأ إزاي؟؟ دي تيجي؟؟ ولا كأن ثورة قامت حضرتك

رحت البنك، سألت موظف الإستقبال عن التحويلات قاللي شباك كذا و إداني طلي صرف أملاه، طبعا أنا مليش في الورق و الإجراءات و حوار اللائحة بتقول و القوانين بتعيد و بتاع، مليت إللي أعرفه و سبت الباقي

التحويل عن طريق شركة، و الشركة دي ليها مكنة عند المصرف. و المكنة بايظة فا ده طبعا ذنب تلاتين أهلي أنا بما أن محدش في مصر بيغلط (غيري تقريبا).. إستني لما يجيلنا التحويل عبر فرع تاني.. إستني..إستني
دخلت في ساعة إلا ربع و فاضل لي 10 دقايق و أتخلق بقدرة قادر في الشغل.. يلعن يحرق

قررت أعمل شكوى لأن مش مشكلتي إن ما حدش كلمني ولا وصللي الفلوس ولاأنا إللي بوظت المكنة

سألت موظف الخزنة أعمل شكوى فين قاللي إدخلي لأستاذة فاطمة الصياد مديرة الفرع

دخلت.. أستاذة فاطمة؟سألت على المكتب فا جت بنت لطيفة كده خدتني المكتب

أستاذة فاطمة؟-

-أيوة؟

صباح الخير، مدام دينا لقمان

أهلا يا فندم.. خير؟

لوسمحتي فيه تحويل بأسمي بقاله 9 أيام و ماجاش لحد ما جيت أنا أسأل عليه و لما جيت قالولي هيتأخر و الساعة 12 إلا خمسة و أنا المفروض أكون في شغلي 12

إتأخر؟؟ ليه؟ طب ثواني أشوف

راحت و رجعت تحكيلي حكاية المكنة البايظة

ماهو حضرتك أنا مش ذنبي إن المكنة بايظة

طب يعني نعمل إيه؟ تروحي فرع تاني؟

لأ ماهو المفروض إن كل الفروع زي بعض فا حتى لو رحت فرع تاني ده علشان إنتو عندكو مشكلة مش أنا

مشيت متعصبة و قالتلي: طب أقعدي أقعدي !!! كأني بنتها مثلا!! (ناس كتير بتاخد إنطباع غلط إني عيلة علشان شكلي – بس ده مش معناه إنها تكلمني كده)

المهم رجعت و معاها البنت اللطيفة إللي خدتني المكتب.. بتسألني و هي مكشرة: ليكي كام؟

نعم؟-

ليكي كام عندنا؟-

الحوالة بكذا (إللي هما زمانهم إتخصمو من مرتبي علشان إتأخرت عن 12 – سندريللا و بتاع)

إتفضلي عدي دول و إمضيلي هنا مرتين-

(عديت الفلوس رغم إني عمري ما بعمل كدا في بنك، و مضيت)

العنوان لو سمحتي و الغرض ناقصين في الطلب إللي ملتيه-

العنوان موجود في صورة البطاقة مش لازم أكتبه-

لأ لازم-

لأ مش لازم لأن حضرتك معاكي صورة البطاقة (مش كتر حبر هو).. بس عايزة أسأل حضرتك إيه الغرض دي؟-

الغرض من التحويل-

يعني إيه؟-

يعني هتصرفي الفلوس في إيه؟ ليه عايزة فلوس؟-

(في سري: وإنتو مالكو؟ حشتري مخدرات!! غيارات داخلية!! أنا حرة هي فلوسي ولا فلوسكو؟)

الغرض شخصي (و كتبت كدا قبل ما تقوللي ما ينفعش)-

في هذه الأثناء كان وشها بيزداد إحمرارا بالتدريج و كأني صبأت بألهة آبائنا الأولين، و إتعصبت و زعقت في البنت اللطيفة :

يا فلانة!!!! بعد كده أي عميل ييجي و المكن بايظ تبعتيه لفرع تاني!!!-