إسترجلي .... و إشربي من دمه

النهاردة بلوج المعاكسات و التحرش الجنسي

أنا هنا هاكلم البنات و الستات بشكل خاص، و إللي يحب يقرا غير دول أهلا بيك إنت برضو مش غريب

وكمان هاتكلم عن أبسط مواقف التحرش.. ماليش دعوة بالإغتصاب لأن ده موضوع محتاج متخصصين و أنا غير مؤهلة

إني واي

هافترض إنك زيي بالظبط و هاكلمك من هذا المنطلق، ده مش صحيح من الناحية الموضوعية بس أنا و إنتي صحاب و مالناش في كلام الجرايد ده.. قشطة؟

طبعاً بتضايقي لما أي حد في أي حته يستهبل عليكي من أول كلمة يا قمر يا عسل لحد مد الإيد.. أكيد عمرك ما حسيتي بالإنشكاح لما إتعاكستي و نزول الشارع و المشي فيه بالنسبة لك شر لابد منه.. و من يوم ما إتعلمتي المشي ما بتحسيش بالراحة و إنتي ماشية في الشارع غير في الزمالك.. ماحنا قلنا بأه هافترض إننا توائم.. فكرتي كتير تحلي مشكلة المعاكسات و التحرش إزاي، سألتي مامتك قالت لك: لو تحرش كلامي طنشي و لو حد مد إيده عليكي صوتي و إفضحي تلاتين أمه.. في النص التاني مش هاختلف مع ماما بس برضو إنتي بتتضايقي من الكلام .. سألتي باباكي أعمل إيه علشان ماحدش يعاكسني؟ قال لك: مين إللي عاكسك؟ شكله إيه؟ ساكن فين؟ و خد منك أي رد هو مستني يسمعه و نزل ضرب شباب المنطقة كلهم بالرصاص على ما فهم إنك بتسأليه عموماً مش لسبب معين

صحابك كفتجية مش مصدر للمعلومات، أخوكي نسخة مصغرة من أبوكي بس معهوش مسدس مرخص.. مافيش حد قاللك كلام ينفع ببصلة.. صح؟ تعالي بأه نتكلم

دلوقتي عايزين أنا و إنتي نتفق على شوية حاجات لطيفة: البنت مش مصيبة، ولا لعنة.. و جودِك في الدنيا مهم و فعال زيك زي الراجل و إلا كان ربنا خلقنا بنتكاثر بالإنشطار كلنا.. مفيش حاجة إسمها أصلي بنت و لا ست و غلبانة و هاعمل إيه يعني و الناس هتقول عليا إيه و الفضيحة و كلام خلف الأسوار بتاع القناة التانية ده

غير كده: فيه حاجة حلوة لازم نعرفها كلنا إسمها (المساحة الشخصية) و دي بتكون في حدود ربع متر حواليكي في أي إتجاه، المساحة دي مش مفروض بني آدم ولا كلب ولا حتى دبانة يقربو منها، إلا إذا كنتي في عربية أو ميكروباس و وقتها ممكن حد يقعد جنبك بأدبه

غير دول برضو: في حاجة أحلى بأه إسمها حرية، طبعا دي ياعيني ماتعرفيهاش لأنك متربية تنسيها و تساويها أحيانا بالإنحراف و التسيب.. وحياة والدك أبو مسدس فكك من الألش ده، البنت من حقها تمشي في الشارع براحتها مهما كانت لابسه إيه.. و إللي مش عاجبه يغض بصره.. و بعدين مفيش داعي نفتح موضوع اللبس لأن الحيوان المتحرش ده ممكن يعاكس قطة نتاية لو عدت من قدامه فا مش فارق معاه لبسك أصلا

نيجي بأه للمهم الفحيت: إزاي تواجهي حيوان المتحرش ده؟

في حالة التحرش الكلامي: لو ماشية في منطقتك و حد كلمك تقوليله بحزم و جدية و بأجمد صوت عندك (مش زعيق) إمشي في شارعنا بأدبك - ماتوجهليش كلام أنا ماعرفكش - إحترم نفسك - أو لو حد جنبك تعرفيه إندهيله (حارس عقار، حارس عربيات) و إسأليه قدام حيوان المتحرش: مين ده و جي هنا ليه و تبع بيت مين؟ علشان لو من منطقتك يتفضح و لو من بره يدفن عندكو و أهو برضو يسمد الشجر إللي في شارعكو

في حالة مد الإيد: لو محجبة و مش عايزة تسييح شيلي دبوس الطرحة و إدفسيه في إيده بأقصي عمق ممكن، لو مش محجبة إستلفي دبوس من محجبة جنبك.. و لو عايزة تسيحي له إطلبيه منها بصوت عالي: ممكن دبوس من طرحتك يا أنسة و هارجعه تاني؟

لو مفيش محجبة جنبك ممكن تلجأي لشنطتك.. حطي فيها بيبرسبراي.. و لو معندكيش أو مش عارفة تجيبيه من بره هاتي إزازة صغيرة فاضية فيها بخاخ.. و إخلطي فيها خل + شطة و مسي بيها على عينين حيوان المتحرش

طبعا في أسوأ الحالات و ده بعد الشر عليكي يعني، هتضطري إنك تضربي المتحرش بنفسك.. إفردي إيدك و ضمي صوابعك جنب بعض و إرزعي إيدك جامد تحت ودانه بالظبط.. (حاولي تنشني يعني مش لازم بالمسطرة) و في نفس الوقت هزأي وإنتي بتقولي عمل إيه: إنت بتمد إيدك عليا يا حيوان؟ و بعد كده سيبي الشعب المصري يتلم و يكمل لك العلقة.. الناس بتستجدع البنت إللي بتدافع عن نفسها و ممكن يعملو معاكي واجب و الواد يحتاج غرز

طبعا لو حبيتي ترتجلي على اللي فوق ده خدي راحتك.. أي إضافات مدمرة للخلطة هتكون مطلوبة

نهايته.. ما تسكتيش.. ما تتكسفيش.. ماتخافيش.. إنت الضحية مش هو.. هو إللي غلطان مش إنتي.. خليكي عارفة ده كويس و ربنا يحفظك و

يحفظنا