طز فيك على فكرة!

بتعاندني.. وبعاندك..

شايفاك بتشد اللي حواليا واحد ورا التاني، وإنت بتبص لي وبتضحك لي ضحكة صفرا.. بمنتهى الشر.. كأنك مستنيني أحصلهم..

لأ!!

مش هاعملك قيمة وآجي معاك، أنا أقوى منك.. ربنا مقويني عليك..

ما أنكرش إني أوقات بضعف من المقاومة.. وبافكر إنه أسهل لي ماقاومش وأجيلك..

بس بارجع تاني أعاندك.. وأقول لأ..

هافضل أضحك.. وأتفائل.. وأنشر طاقة إيجابية في الكون..

هافضل مكلبشة في أي شوية أمل جوايا..

وأطلّع لك لساني وأغيظك..

علشان إنت ولا حاجة..

وقلبي كل حاجة..

طز فيك يا إكتئاب.. روح موت بقا!!